L'uniun da giuventetgna, sco quei ch'ella sepresenta oz, ha sias ragischs gia avon igl onn 1801 (emprem document nua che la cumpignia da mats vegn menziunada). Da quei temps senumnava ella cumpignia da mats. Sco il num di, apparteneva a quella cumpignia mo giuvens d'il vitg, naven dalla finiziun dalla scola entochen la maridaglia. La cumpignia da mats haveva l'incumbensa d'inaugurar ils giuvenils en la cumminonza dils carschi. Tschun elements fundamentals s'udevan tier las cumpignias da mats grischunas.

• activitads societaras
• caracter ecclesiastic
• tempra militara
• funcziun giudiziala
• effectivitad politica

Aschia influenzava la cumpignia da mats era las decisiuns politicas dil vitg. La giurisdicziun che la cumpinia fegeva vegneva temida, era sch'ella era buca renconuschida. La dertgira aulta da Mustér ha remarcau el 18avel tschentaner, ch'ei hagi dau truaments exegerai d'ina «dertgira nauscha», denton hagien quels process illegals magari menau tier meglieras consequenzas ch'ils truaments ufficials dallas suprastonzas. Oriundamein prendevan las cumpignias da mats part a l'uiara. Ellas seformavan agl ur da lur vischnauncas, per esser promts da batter. La revoluziun franzosa ha extirpau ell'entira svizra las cumpignias da mats, cun excepziun dil grischun.

Egl onn 1920 ein las cumpignias da mats vegnidas reorganisadas ed han survegniu ina tempra ecclesiastica. La recepziun ella cumpinia succedeva en rama festiva da sogn Stiafen enteifer in survetsch divin. Quei usit vegn aunc oz practicaus tier l'uniun da giuventetgna da Mustér. Suenter il secund consil vatican ein las cumpignias da mats vegnidas fusiunadas cun las uniuns da mattauns. L'uniun da giuventetgna  sco quei ch'ella exista oz ei vegnida fundada ils 14 da december 1974. Era las finamiras ein semidadas e s'adattadas al temps. Aschia vegn oz mess peisa sin:

• promover solidaritad ed amicezia denter la giuventetgna
• tgirar ils usits tradiziunals

L'uniun ensiara l'entira giuventetgna dil vitg naven da 16 onns entochen la maridaglia.