Scret da Gion Hosang, 2006.

Sco usitau tier l'UGG ha la radunonza generala liug in meins avon che Sontgaclau vegn. Era jeu hai giu peda e sundel serendius el hotel Bellavista. Arrivaus leu sundel lu era promts ius ina lingia giu en la bar dil hotel. Lezza era denton serrada. Gl'emprem patratgei staus: Haiel jeu sbagliau il datum? Fuss gie ualti penibel. Cun quels patratgs sundel ius en l'ustria dil hotel. Ed hai tschaghignau da sala en. Leu seseva ina giuvna cun rastas. Hm quei ei era buc quels da l'UGG. El medem mument di la cameriera che l'Uniun da giuventetgna fetschi oz radunonza en sala. Enten serender en sala studegiel jeu lu vinavon, tgei commembras novas che entrien en l'uniun... Cura che jeu sundel lu staus en sala, haiel jeu lu era enconuschiu l'Africana. Ei era negin auter che la presidenta.

La radunonza ha entschiet. Presents eran 14 persunas e perstgisau havevan era ca. tontas. Il punct il pli interessant per mei ei quel da las elecziuns. Damai che tut saveva che la presidenta Jris detti giu siu post ei la gronda damonda stada: tgi supren il post da presidenta/president.

Entochen ch'igl ei denton stau aschi lunsch havein nus denton aunc giu in per autras tractandas. Uonn era schizun il protocol da la davosa radunonza generala avon maun. Aschia che nus havein puspei ina gada giu legher da tedlar tier a nies actuar Scalper. La presidenta ha era aunc dau giu siu rapport cun tut quei ch'ei curriu e passau tier l'UGG igl onn vargau. E lu ei il la cassiera Eveline Giossi vegnida vidlunder. Ella ha raquintau da gudongs gronds e da quels pli pings, che han fatg surstar. Il punct culminont ei lu denton staus ch'ei detti aunc ina cassa, cun danners, tier in anteriur cassier (dil reminent ha quai cassier dau giu siu post avon varga 3 onns). Las respectiv la revisura ha constatau ch'ei seigi denton tut en uorden ed il quen constetti.

Il commembers novs havein nus secapescha era priu si. Quei denton senza ch'els eran presents. Tgi ch'enconuscha denton l'UGG sa era ch'il novits vegnan pri si endretg la sera da Sontgaclau. ;-)

E lu eis ei stau aschi lunsch! La damonda: tgi presidiescha l'uniun per ils proxims dus onns. L'Jris ha lu era gest fatg ina proposta. L'Ursina duei daventar nossa presidenta. Quei han lu era tuts suteniu ed ella ei vegnida elegida unanimamein. Cordiala gratulaziun e bien success!

Ina tractanda impurtonta da la radunonza generala ei lu era quella da "Sontgaclau". Glieud havein nus sco pli u meins adina anflau detgavuonda. Il grond caos ha ei lu denton dau tier la partiziun tgi che ei sur e tgi sut via. Denton era quella damonda ei sesligiada.

Sut il program d'unviern ha ei lu dau ina roscha propostas ord las quallas la suprastonza sa encurir ora in ni l'autra.

Suenter la radunonza han in per commembras e commembers lu aunc suandau l'invitaziun da nies commember passiv GM. Tier lez essan nus lu aunc stai entochen tard viaden en la damaun (aschi da dir sco emprova generala per Sontgaclau). Entuorn las quater havein nus lu era schau lez en ruaus ed essan serendi a casa.