Ins pudes tertgar che l'UGG hagi fatg ina sgnacca d'emprem avrel. Ir igl emprem avrel tier ina famiglia e dumandar sch'els lessien schar midar entuorn enzatgei en vid ni en ina da lur stanzas... quei ei schon in tec suspect. L'UGG ha tuttina fatg ei.

La Helena - l'organisatura dil project - ha elegiu duas famiglias per il project AVENZIO UGG ed ha priu si contact cun quellas. Omisduas famiglias ein stadas promtas da separticipar a quei project. Igl ei la famiglia Christina e Crosin Bundi cun Serafin e Bianca e la famiglia Daniela e Raimund Schnoz cun Gianna e Flavia.

Era ils profis dalla televisiun san buca semplamein vegnir dad esch en e lu gia saver tgei e co far las midadas e lu aunc haver tut igl uorden. Aschia ch'era nus (Helena, Jris e Gion) essan semess sin via per far ina viseta a quellas duas famiglias. E quei - ei mava buca auter - igl emprem d'avrel.

Suenter in discuors intensiv cun ils patruns casa ed la pertuccada resp. il pertuccau ha ei aunc giu num da mirar e miserar ora las stanzas.

Denter las duas visetas tier las famiglias essan nus aunc stai a tscheina per discutar ora empau detagls. Nus havein giu mo cletg da buca survegnir scamond da metter pei en casa, damai che la Helena havess en si'euforia bunamein barschau giu igl entir hotel Alpsu. Per cletg ha ei mo dau in pign donn material dad in pupi A4 che ha piars in cantun.

La secunda viseta ha giu liug tier ils Schnoz. Leu havessan ein bunamein stuiu better nus dad esch ora - quels stoda tips dall'UGG ein schon dètgs hockers! Tard la notg ni baul la damaun han els denton era anflau igl esch ed ein semess encunter casa.

Suenter tut quellas impressiuns ha ei valiu per la Helena da studegiar la situaziun cumprar igl uorden e semtgar quel. Da l'autra vart ha ella lu aunc giu d'organisar la glieud e mirar cu che quella havess dad esser el liug.