Igl ei ussa vargau ina jamna (29 e 30 d'avrel 2006) dapi che commembras e commembers dall'UGG ein stai tier la Famiglia Daniela e Raimund Schnoz per metter sil tgau la combra dalla Flavia.

E pil ver, ins sa veramein dir metter sil tgau! Naven da scarpar ora teppis e stuschar vi e neu mobilias ei vegniu fatg tut.

Il program da lavur ei staus ualti pulpius. Arrivai la sonda suenter miezdi ha ei giu num da gas e rumiar tut quei ch'era pusseivel ord la stanza. Tut dano las mobilias. Lezzas eran memia grondas per prender viadora. Suenter haver pustau tut dad ina vart dalla combra ei il teppi vegnius scarpaus ora. Quei ei pli u meins stau fatg ualti spert.

E lu hai dau colur... Il tabliau cun che haveva avon onns retschiert in lac che tarlischa ei danovamein vegnius coluraus. Fetg sco pli baul. Lu vegneva era tut dau colur blau e verd e quei lu aunc en las colurs las pli glischontas pusseivalas. Forsa ha nossa Helena era gia viu quei ed ha schau s'inspirar da quels temps gia daditg vargai. naven da plantschiu su tochen preits escha e finiastras ha tut survegniu ina colur da fundament alva. Tgi che ha viu in tabliau sa lu era semaginar con spert che quei va da colurar quel. Pils presents tonscha in soli plaid: RILAS! Gie da quellas graischlas largias nua che mo in penselet haveva plaz deva senza fin. Tochen tard viaden ella notg ein las commembras ed ils commembers stai ed han strihau ed empleniu RILAS e RILAS e RILAS. Per part vesevan ei gia dubel ellas. Denton gliez pudeva forsa era esser in effect d'in cert liquid...

L'auter di eis ei iu vinavon. Cunquei che la lavur era fatga il di avon stupent ha ei buca dau tontas RILAS. Vul dir ei mava buca aschi vess - ni forsa era quei gia rutina - da da colur a quellas. Quella gada ha ei dau empau oransch e tgietschen.

Duront il dar colur han las commembras ed ils commembers giu bia legher ed in pèr ni plitost in pèr biars strehs cul penel han gartegiau la collega ni il colleg. Aschia ha ei pudiu veser ora ualti legher cura che las commembras ed ils commembers ein stai la dumengia da miezdi a magliar kebab enta vitg.

Las mobilias einpuspei vegnidas stuschadas dad in cantun en l'auter, tochen ch'ellas eran el liug che nossa menadra da project ha vuliu ellas. Era la decoraziun ha buca astgau muncar. Co igl ei vegniu decorau e co ei vesa ora la fin dallas fins ... gliez dat ei da mirar dalla sera famigliara!

In grond engraziament va secapescha alla Daniela ed al Raimund per lur cordiala hospitalitad. A nus ha ei muncau duront quels dus dis vid nuot. Nus essan vegni pupergnai cun da magliar e da beiber aschi fetg che segir tuts han priu tier in per kilos ;-) Engraziel fetg!

Dalla partida ein stai quels dus dis: La Helena, la Jris, la Daniela, la Sonja, la Marina Lombriser, il Roman, il Gion Mihel ed il Gion.