Ir tier la gallaria.

Ils 23 d'avrel 2006 ha ei giu num tier l'UGG per lemprema gada AVENZIO UGG. Gie ti has viu endretg, ina biala dumengia ni pli exact da dumengia alva! Damai ch'ils commembers dall'uniun lavuran ni van a scola duront la jamna eis ei buca bia auter pusseivel che da menar atras nies project mintgamai la dumengia. Damai che nus fagein denton enzatgei dil bien per nos convischins, sperein nus che quei disturbi negin.

Tier la famiglia Bundi essan nus arrivai la dumengia suenter gentar allas 13.00 uras. Suenter che la Helena ha raquintau a tuttas e tuts tgei che cuora e passa il suentermiezdi ha mintgina e mintgin entschiet cun sia lavur. Naven dil montar dapart scaffas tochen tier il schubergiar las finiastras ei bia semidau en la combra dil serafin.

Il Serafin ha lu era survegniu in pensum. Era el ha astgau separticipar vid la midada en sia combra.

Tgei ch'ei tut schabegiau en quella combra e co ei vesa ora, gliez tradeschel jeu ussa bu cheu. Schiglioc ei il film insumma buca pli interessants. Questa jamna vegnan aunc las davosas mobilias furnidas e sonda proxima savien nus aunc registrar las davosas finessas.

Suenter che la gronda part dalla lavur ei stada fatga han tuts giu grond plascher din sitg, ch'ei vegnius offerius dalla Christina. Engraziel fetg! La Cornelia, che ha deplorablamein buca saviu gidar nus, ei denton levada baul la damaun per far per nus ina prima petta. Quella havin nus lu era schau gustar.

Dall'UGG ein stai dalla partida la dumengia vargada: Helena Casanova, Jris Casanova, Ursina Giger, Sonja Schmed, Daniela Hosang, Gion Michel Flepp e Gion Hosang

Sonda proxima entschavin nus era gia tier la famiglia Schnoz. Dapli saveis lu puspei legier cheu sin questa pagina.